මැලේරියා කියලා කියන්නේ තදබල, සමහර විට මරනය පවා ගෙනදිය හැකි රෝගයකි. ප්ලාස්මෝඩියම් පවුලේ පරපෝෂිතයන් වර්ග 5න් එක් පරපෝෂිතයෙක් නිසා හැදෙන මැලේරියාව ආසාදිත මදුරුවෙකුගේ දෂ්ඨ කිරීම නිසා මිනිසුන්ට බෝවෙනවා. ඔයා නිතරම එහෙ මෙහෙ යන එන ගැටවරයෙක් හරි පිටරට ඉදලා එන අයව ඇසුර කරන කෙනෙක් හරි නම් ඔයාට මේ රෝගය හැදීමේ අවධානමක් තියෙනවා.
ශ්රී ලංකාවේ මැලේරියාව පැතිර යන එක පාලනය කරල තියෙන්නේ. ඒත් මැලේරියා ස්ථානික රටවල් වලින් එන අයගෙන් අපිට මේ රෝගය එන්න පුළුවන්.
සමහර විට ඔයාට මැලේරියා තියෙන රටක ජීවත් වෙන්න වුණොත්, ඉර බහින වෙලාවේ ඉඳන් පසුවදා ඉර නගින වෙලාව වෙනකම් කාලයෙදි මැලේරියා රෝගය බෝවීමේ අවධානම තියෙනවා. ඔයා මදුරුවන් දශ්ඨ කිරීම අධික මේ කාල සීමාවේදී එළිමහනේ වැඩ වල යෙදෙනවා නම්, ඈත ගම්බද ප්රදේශවල රෑට ඉන්න වෙන සංචාර එහෙම කරනවා නම්, ඔයා ඉන්නේ ටිකක් ලොකු අවදානමක.
පහත දක්වලා තියෙන විදිහට වැඩ කළොත් මැලේරියා අවදානම අඩු කර ගන්න ඔයාටම පුළුවන්.
- සිරුර වැසෙන විදියට අත් දිග හා දිග කකුල් / සාය තියෙන ඇඳුම් අඳින්න.
මදුරු විකර්ශක හෝ ආලේපන භාවිතා කරන්න.
රාත්රියේ හා හිමිදිරියේ එළිමහනේ ගැවසීමෙන් වැළකින්න. (වනාන්තර තුළ පරිසර සංචාරයෙන් වළකින්න.)
ඇඳ දැල් තුළ නිදන්න. කල්පවත්නා කෘමි විකර්ෂක ගැල් වූ ඇඳ දැල් නම් වඩාත් සුදුසුයි.
මැලේරියා වළක්වන ඖෂධ ගන්න.
මැලේරියා පරපෝෂිතයන්ගෙන් ආසාදිත මදුරුවන් දෂ්ඨ කළොත් මැලේරියාව ඔයාට බෝ වෙනවා. මේ රෝගය පතුරවන මදුරුවන් සාමාන්යයෙන් ක්රියාකාරී වන්නේ ඉර බැසීමේ සිට ඉර නැඟීම දක්වා කාලයේ නිසා, ඒ ගැන ඔයාට සැළකිලිමත් වෙන්න වෙනවා.
මැලේරියා පරපෝෂිත වර්ගය අනුව රෝග ලක්ෂණ ඇති වෙන්න සතියක සිට මාස කිහිපයක් දක්වා කාලය ගත වෙන්න පුළුවන්. රෝගය තදින් ඇති වුණොත් කෝමා තත්ත්වය, වකුගඩු අකර්මන්ය වීම වගේම කම්පනය ඇතිවීම සිදුවෙනවා. එහෙම වුණොත් මරණයට පත් වෙන්නත් ඉඩ තියෙනවා.