ඔයාට අසාත්මිකතාවයක් ඇතිවෙලා කියලා දැන ගත්තාම පළමුවෙන්ම කරන්න ඕනෙ දේ, කලබල වෙන්නේ නැතුව ඉන්න එක. ඔයා මේකෙන් මැරෙන්නේ නැහැ. ඊලඟට කරන්න ඕනැ දෙමාපියන්ට හරි වෙන වැඩිහිටියෙකුට හරි ඒ තත්ත්වය දැනුම් දෙන එක. සිරුර වෙහෙසීමෙන් තත්ත්වය බරපතල වෙන්න ඉඩ තියෙන නිසා, කළබල වෙලා දුව පැන ඇවිදින්න නොගිහින් ප්‍රතිකාරවලට යොමු වීම අත්‍යවශ්‍යයි. නියම ප්‍රතිකාරය අරගෙන පැයකින් විතර ඔයාගේ අපහසුතාවය නැතිවෙලා යන නිසා අනවශ්‍ය විදියට කලබල වෙන එකේ කිසි තේරුමක් නෑ.
ඒත්, ඒක උග්‍ර අසාත්මිකතාවයක් නම් ඔයාට ඇඩ්‍රිනලීන් එන්නත ලබා ගන්න ඕනැ වෙන්න පුළුවන්. ජීවිත අවදානම ඇති කරන අසාත්මිකතාවය ඇති අයට සරල පුහුණුවකින් පහසුවෙන් පාවිච්චි කරන්න පුලුවන් EPI PEN එන්නත පාවිච්චි කරන්න වෙනවා. තදින් මතක තියා ගන්න ඕනෙ දේ තමයි මේ එන්නත පාවිච්චි කරන්න ඕනෙ උග්‍රම අසාත්මිකතාවයක් තියෙනවා නම් විතරයි කියන එක. ඒ විතරක් නොමෙයි ඒ එන්නත ලබා ගත්තට පස්සේ ඔයා නොවරදවාම රෝහලකට ඇතුලත් වෙන්න ඕනැ.
පහත තියෙන උපදෙස් පිළිපැද්දොත් අසාත්මිකතාවය වළක්වා ගන්න ඔයාටම පුළුවන්.
- ලැජ්ජා වෙන්න එපා.
- ඔයාගේ අසාත්මිකතාවය ගැන අන් අයව දැනුවත් කරන්න. එවිට ඔවුන් ආහාර පිළියෙල කරද්දි ඒ ගැන සැළකිලිමත් වෙයි.
- කම්මැලි වෙන්න එපා.
- ගෙදර දූවිලි, මැස්සො, මවිල් තියෙන කොට ඔයාට අසාත්මිකතාවය ඇති වෙනවා නම්, නිතර ගේ දොර අතුගාලා පිරිසිදුව තියන්න. කොට්ට මෙට්ට නිතර පිරිසිදුව තියා ගන්න.
- අපරික්ෂාකාරීව එළිමහනේ යන්න එපා.
- ඔයාට කෘමි සතුන්ගේ විස අසාත්මික වෙනවා නම් එළිමහනේ යනකොට පරිස්සම් වෙන්න. අත්‍යවශ්‍ය බෙහෙත් නිතරම ඔයා ලඟ තියා ගන්න.
- දොස්තරට ලෙඩේ හංගන්න එපා. ඕනැ ලෙඩකට බෙහෙත් ගන්න කලින් බෙහෙත් වලට ඔබේ ඇති අසාත්මිකතා ගැන වෛද්‍යරයා දැනුවත් කරන්න.
- ගන්නන් වාලේ රෙදි ගන්න එපා.
- ඔයාට රෙදිපිළි අසාත්මික වෙනවා නම් ඔයා අඳින ඇඳුම් වගේම පරිහරණය කරන රෙදි තෝරා ගැනීමේ දී සැළකිලිමත් වෙන්න.
ඇයි ඇලර්ජික් ද කියලා කවුරු හරි ඇහුවොත් දෙන්න ඕන උත්තරේ දැන් ඔයා දන්නවා.
